Արդարադատության միջազգային դատարանը ապրիլին լսումներ կանցկացնի Ադրբեջանի և Հայաստանի առարկությունների վերաբերյալ՝ փոխանցում է Reuters-ը։
«Երկու երկրները միմյանց մեղադրում են ՄԱԿ-ի հակախտրականության պայմանագիրը խախտելու համար։ Կողմերից յուրաքանչյուրը մյուսին մեղադրում է էթնիկ զտումների համար։ Ապրիլյան լսումները կանդրադառնան ԱՄԴ-ի իրավասությանն առնչվող իրավական առարկություններին և չեն շոշափի խտրականության պահանջների էությունը»,- ասված է հրապարակման մեջ:
Հայաստանն Ադրբեջանի դեմ հայց է ներկայացրել 2021 թվականին։ Այնուհետև Ադրբեջանը հակառակ հայց է ներկայացրել՝ Հայաստանին մեղադրելով նույն պայմանագիրը խախտելու համար։ Այժմ երկու պետություններն էլ իրավական առարկություններ են ներկայացրել միմյանց, որը քննվելու է ապրիլի 15-19-ը: