Իրանի արտգործնախարար Հոսեյն Ամիր Աբդոլլահիանը Դոհա այցի ընթացքում հանդիպել է Կատարի էմիր շեյխ Թամիմ բեն Համադ Ալ Թանիի հետ: Քննարկվել է Գազայի շուրջ ստեղծված իրավիճակը:
Աբդոլլահիանն ընդգծել է Պաղեստինի հարցում «իսլամական երկրների միասնական դիրքորոշման և Իսրայելի հանցագործությունները կանխելու» հարցում ջանքեր գործադրելու անհրաժեշտությունը: Նրա խոսքով՝ իրավիճակն ավելի է սրվում, և պետք է օգտագործել պատերազմը կանգնեցնելու քաղաքական վերջին հնարավորությունները՝ հակառակ դեպքում իրավիճակը վերահսկողությունից դուրս կգա: Իրանի ԱԳ նախարարը և Կատարի էմիրը դատապարտել են Իսրայելի ռազմական գործողությունները Գազայի հատվածում։
Աբդոլլահիանը Կատարում հանդիպել է նաև ՀԱՄԱՍ-ի քաղբյուրոյի ղեկավար Իսմայիլ Հանիեի հետ: Վերջինս Իրանի ԱԳ նախարարին մանրամասներ է ներկայացրել Գազայում տիրող իրադրության մասին։
Կատար այցից անմիջապես հետո Աբդոլլահիանը նոյեմբերի 1-ին կմեկնի Անկարա։ Թուրքիայի ԱԳ նախարարի հետ կքննարկվեն տարածաշրջանային հարցերը, մասնավորապես, իրավիճակը Գազայում, ինչպես նաև երկկողմ հարաբերությունները։