Google և SpaceX ընկերությունները քննարկում են Երկրի ուղեծրում տվյալների մշակման կենտրոններ (data center) տեղադրելու հնարավորությունը։ Այդ մասին հայտնում է The Wall Street Journal թերթը։
Նախագծի նպատակը կարող է լինել արհեստական բանականության և ամպային տեխնոլոգիաների համար անհրաժեշտ հաշվարկային հզորությունների ընդլայնումը, ինչպես նաև էներգիայի և հովացման ծախսերի կրճատումը։
Լրատվամիջոցի տվյալներով՝ ուղեծրում տեղակայված տվյալների կենտրոնները կարող են աշխատել արևային էներգիայով և ավելի արդյունավետ լուծել գերտաքացման խնդիրը, որը դարձել է ժամանակակից AI ենթակառուցվածքների հիմնական մարտահրավերներից մեկը։
Փորձագետների կարծիքով՝ նման նախաձեռնությունը դեռ գտնվում է վաղ փուլում, սակայն այն կարող է էականորեն փոխել ապագայի տեխնոլոգիական ենթակառուցվածքները և տիեզերական տեխնոլոգիաների կիրառումը կոմերցիոն ոլորտում։