Միայն այս լիազորության շրջանակում մենք ՀՀ-ին ենք վերադարձրել շուրջ 10 մլն 276 հազար ամերիկյան դոլարին համարժեք 3 մլրդ 933 մլն դրամ՝ շուկայականին մոտարկված կադաստրային արժեքով, 280 հազար 338 քառակուսի մետր մակերեսով անշարժ գույք, բացի դրանից՝ 2 մանկապարտեզ և 1 մարզադաշտ: Այդ մասին Կառավարության՝ հոկտեմբերի 2-ի նիստին ասաց ՀՀ գլխավոր դատախազ Աննա Վարդապետյանը՝ ներկայացնելով պետական ու համայնքային շահերի պաշտպանության գործառույթի շրջանակում իրականացված աշխատանքները վերջին 9 ամիսների կտրվածքով:
«Բացի դրանից՝ բռնագանձվել է 654 հազար ամերիկյան դոլարին համարժեք 249 մլն դրամ: Կրկնում եմ՝ սա միայն պետական ու համայնքային շահերի պաշտպանության մեր լիազորությունների շրջանակում է:
Կանխելով հարցը միասնական միջոցների հաշվի մասով, որն անցյալ տարվա դեկտեմբերի 5-ին Կառավարության որոշմամբ սկսեց գործել, այս պահի դրությամբ ունենք 52 մլն 254 հազար ամերիկյան դոլարին համարժեք շուրջ 20 մլրդ դրամ՝ մի փոքր ավելի 20 միլիարդից»,- ասաց նա: