Մոսկվայում Ադրբեջանի դեսպան Ռահման Մուստաֆաևին Ռուսաատանի արտաքին քաղաքական գերատեսչությունում բողոքի նոտա է հղվել:
«Ռուսաստանի Դաշնության արտաքին գործերի նախարարի տեղակալ Միխայիլ Գալուզինի հետ հանդիպման ընթացքում դեսպանին բողոք է ներկայացվել Բաքվի վերջին ոչ բարեկամական գործողությունների, երկկողմ հարաբերությունների կազմաքանդման ուղղությամբ ադրբեջանական կողմի գիտակցված քայլերի կապակցությամբ: Դրանց թվում են միջպետական երկխոսության շրջանակում բարձր մակարդակի միջոցառումների չեղարկումը, իշխանությունների մատուցմամբ ադրբեջանական ԶԼՄ-ներում սանձազերծված ռուսատյաց արշավը, ադրբեջանական իրավապահ մարմինների աղաղակող, անընդունելի գործողությունները ռուսական «Սպուտնիկ Ադրբեջան» լրատվական գործակալության և դրա աշխատակիցների դեմ»,- ասված է ՌԴ ԱԳՆ հաղորդագրության մեջ:
Նշվում է, որ Ադրբեջանի դիվանագիտական առաքելության ղեկավարին բանավոր նոտա է հղվել՝ Բաքվում ձերբակալված ռուս լրագրողներին անհապաղ կալանքից ազատելու պահանջով:
Ադրբեջանական կողմն էլ հայտնել է, որ դեսպան Ռահման Մուստաֆաևը Ռուսաստանի արտաքին գործերի նախարարությունում Գալուզինին բողոքի նոտա է փոխանցել՝ կապված Եկատերինբուրգում ադրբեջանցիների սպանության հետ:
Ավելի ուշ հայտնի դարձավ, որ Բաքվի դատարանը չորս ամսով կալանավորել Է «Սպուտնիկ Ադրբեջան»-ի ղեկավար Իգոր Կարտավիխին և գլխավոր խմբագիր Եվգենի Բելոուսովին: