Հյուսիսատլանտյան դաշինքը պետք է Ռուսաստանի նկատմամբ ավելի ագրեսիվ դիրքորոշում որդեգրի՝ չբացառելով կանխարգելիչ հարվածը, հայտարարել է ՆԱՏՕ-ի ռազմական կոմիտեի նախագահ, ծովակալ Ջուզեպպե Կավո Դրագոնեն։
Financial Times-ի հետ հարցազրույցում նա ասել է, որ «դաշինքը քննարկում է Մոսկվայի հիբրիդային պատերազմին արձագանքն ուժեղացնելու հնարավորությունը»։ Նա նշել է, որ ամենակարևոր հարցն «ապագա ագրեսիայի զսպումն է»։
Բարձրաստիճան զինվորականի համոզմամբ՝ զսպել կարելի է պատասխան, կանխարգելիչ հարվածի միջոցով: «Մենք պետք է դա խոր վերլուծենք, քանի որ ապագայում Ռուսաստանի կողմից ճնշումը կարող է ուժեղանալ»,- հավելել է ծովակալը։
Դրագոնեի խոսքով՝ Ռուսաստանի դեմ կանխարգելիչ հարվածը կարող է համարվել «պաշտպանական գործողություն», միաժամանակ նշել է. «Դա դեռևս հեռու է մեր սովորական մտածելակերպից ու գործողությունից»։