ՀՀ վարչապետ Նիկոլ Փաշինյանը 44-օրյա պատերազմի հանգամանքների ուսումնասիրման քննիչ հանձնաժողովում է: Նա նշեց` եթե կլինեն հրապարակայնորեն քննարկման ոչ ենթակա հարցեր, ապա կարող են դրանց անդրադառնալ արդեն փակ ռեժիմով:
Վարչապետն անդրադարձավ ԼՂ երկրորդ պատերազմը կանգնեցնելու մասին ՌԴ, ՀՀ և Ադրբեջանի ղեկավարների եռակողմ հայտարարությանը: Ինչու ստորագրեց, և պատերազմը կանգ առավ հենց այդ օրը. այս հարցին ի պատասխան` նա նշեց, որ էական դեր խաղաց Շուշիի կորուստը:
«Դրանից հետո, ըստ էության, հարվածի տակ էր հայտնվելու Ստեփանակերտը, կուժեղանար ճնշումը Մարտունու վրա, և մեր շուրջ 25 000 զինվոր կհայտնվեին շրջափակման մեջ ընկնելու վտանգի տակ»,- ասաց նա:
Նիկոլ Փաշինյանը նշեց, որ այդ հայտարարությունը պատերազմը կանգնեցնելու 5-րդ փորձն էր, իսկ առաջինը եղել է ՌԴ նախագահ Վլադիմիր Պուտինի ծննդյան օրը, երբ ՀՀ վարչապետը շնորհավորել է նրան, ՌԴ նախագահը նշել է, որ ցանկանում է միջնորդական ջանքեր գործադրել, հետո պարզվել է` Ադրբեջանի նախագահն ասել է, որ համաձայն չէ հրադադար հաստատելու:
Ադրբեջանը նախապայմաններ է ներկայացրել, որոնք ընդունելի չեն եղել: