Ամփոփվեց «Երիտասարդական աշխատողի վերապատրաստում» ծրագիրը

Միջոցառմանը ներկա էին ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը, ՀՀ-ում Յունիսեֆի ներկայացուցչի տեղակալ Սիլվիա Մեստրոնին, «Երիտասարդական նախաձեռնությունների կենտրոն» ՀԿ խորհրդի նախագահ Արթուր Նաջարյանը, տեղական և միջազգային գործընկեր կառույցների ներկայացուցիչներ և ծրագրի մասնակիցներ:

 Միջոցառման պաշտոնական մեկնարկին ողջույնի խոսքով հանդես եկավ ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը՝ ընդգծելով, որ երիտասարդական աշխատանքի և երիտասարդական աշխատողի ինստիտուտի նկատմամբ հետաքրքրությունը զգալիորեն մեծացել է, իսկ այս տարի ընդունված Երիտասարդության մասին օրենքն ամրագրում է պետության կողմից ոլորտում կատարվող քայլերը և կարևոր սկզբունքները:

 Շարունակելով ողջույնի խոսքերը՝ ՀՀ-ում Յունիսեֆի ներկայացուցչի տեղակալ Սիլվիա Մեստրոնին նշել է, որ երիտասարդական աշխատանքի մասնագիտացումը հզոր բազմապատկող ազդեցություն է ունենում, երբ վերապատրաստված երիտասարդական աշխատողները մատուցում են ավելի արդյունավետ ծառայություններ պատանեկան ու երիտասարդական խմբերին՝ համայնքներում ստանձնելով խթանիչ դեր։

 Ողջույնի խոսքով հանդես եկավ ՀՀ տարածքային կառավարման և ենթակառուցվածքների նախարարության տեղական ինքնակառավարման քաղաքականության վարչության պետ Աշոտ Գիլոյանը՝ անդրադառնալով երիտասարդների դերի կարևորությանը բոլոր ոլորտներում և ընդգծելով, որ ՏԻՄ-երը պետք է նպաստեն նրանց զարգացմանը, ակտիվացմանը և համայնքային գործընթացներին ներգրավմանը

 «Երիտասարդական նախաձեռնությունների կենտրոն» ՀԿ խորհրդի նախագահ Արթուր Նաջարյանը ամփոփելով ողջույնի խոսքերը՝ շնորհավորեց ծրագրի մասնակիցներին և նշեց. «Դուք՝ երիտասարդական աշխատողներդ, մեր համայնքների առաջատար և շարժիչ ուժն եք: Այս վերապտրաստման ծրագիրը պարզապես ուսուցում չէ, այլ ռազմավարական ներդրում՝ ձևավորելու մասնագետների, ովքեր կոչված են աշխատելու երիտասարդների՝ ամենազգայուն և նաև ամենակարևոր շերտի հետ։ Իրական աջակցություն ցուցաբերելու համար անհրաժեշտ է տեղում ապահովել բարձր մակարդակի մասնագիտական համագործակցություն, և երիտասարդական աշխատողը պետք է հանդես գա որպես հմտություններով, կարողություններով ու պատասխանատվությամբ զինված առաջնորդ: Մեր վերապատրաստումը հենց դրան է ուղղված, և դուք այն հաջողել եք»:

 Պաշտոնական ելույթներին հաջորդեց ծրագրի ընթացքն ու արդյունքները ներկայացնող կարճ տեսահոլովակի ցուցադրություն։ Որից հետո ծրագրի մասնակիցներից, մասնավորապես՝ համայնքապետարանների, երիտասարդական կենտրոններ գործարկող կառույցների և հասարակական կազմակերպությունների երիտասարդական աշխատողներից մեկական ներկայացուցիչ կիսվեցին վերապատրաստման դասընթացին մասնակցության իրենց փորձառությամբ, մարտահրավերներով և հաջողություններով:

Վերապատրաստման ծրագրին վերաբերող մարտահրավերների ու հնարավորությունների մասին իրենց դիտարկումներն ու առաջարկները ներկայացրին ԱՄՆ Խաղաղության կորպուսի երիտասարդական ծրագրերի ղեկավար Ստեփան Սհոյանը և երիտասարդական ոլորտի փորձագետ, դասընթացավար Աննա Եղոոյանը:

 Միջոցառման ավարտին ծրագրի բոլոր մասնակիցները, ովքեր նաև մասնակցել էին գիտելիքների ամփոփիչ գնահատմանը, ստացան մասնակցության հավաստագրերը:

 Ծրագիրն իրականացվել է Գյումրու «Երիտասարդական նախաձեռնությունների կենտրոն» ՀԿ-ի կողմից՝ ՀՀ ԿԳՄՍ նախարարության աջակցությամբ, ինչպես նաև ՅՈՒՆԻՍԵՖ-ի հետ համագործակցությամբ՝ ԵՄ ֆինանսական աջակցությամբ: