2024 թվականին մեծ հավելում է նախատեսվում ամբուլատոր-պոլիկլինիկական բժշկական օգնության ծառայությունների համար: Ունենք ավելացում 3,1 միլիարդ դրամի՝ 11,1 տոկոսի աճ: Այդ մասին Ազգային ժողովում 2024 թվականի պետբյուջեի հատկացումների մասին քննարկման ժամանակ ասաց առողջապահության նախարար Անահիտ Ավանեսյանը:
«Այս հավելյալ միջոցներն ուղղվելու են ոչ միայն մեր բուժաշխատողների աշխատավարձերի հաջորդիվ բարձրացմանը, այլև որոշակի առումով փոխվելու է ծառայությունների շրջանակը:
Ավելանալու են մեր առաջնային օղակի բարեփոխումների մեջ ներառված առաջին էտապի համար հետազոտությունների քանակները, դրանց ծավալները»,- ասաց նախարարը:
Ավանեսյանը նաև տեղեկացրեց, որ մինչև տարեվերջ կավարտվի նաև Դսեղի ամբուլատորիայի կառուցումը, որը մոդելային նոր տիպի ամբուլատորիա է: Առաջիկայում կավարտվեն նաև վերազինման և փաստաթղթային փոխանցման աշխատանքները: Ըստ նախարարի՝ այն կառուցվել է COAF հիմնադրամի հետ համատեղ:
«Դսեղի ամբուլատորիայում մենք իրականացնում ենք, արդեն իսկ ունենք գծված մոդելային նոր աշխատանքի ձև: Այս պիլոտը 6 ամիս փորձարկելուց հետո արդեն կտարածենք ապահովագրության շրջանակներում նաև մեր մյուս ամբուլատորիաների և պոլիկլինիկաների վրա»,- ասաց նախարարը: